Fnast

Fotocopies Impresión

La Gueta

Cuinchi

Naz en Caboalles d’Abaxo’l "Club Xeitu". La robla del acta fundacional y los estatutos de la entidá pon fin a delles selmanes trabayando na definición y forma de la idea, anque da entamu al trabayu que de magar agora habrá de llevase a cabu pa materializar les intenciones de la nueva asociación. La presidencia honorífica de la mesma recairá en María Luisa Jorissen, mientres que’l vicepresidente sedrá Manuel Gancedo, correspondiendo’l cargo de secretario a Víctor del Reguero y el de vocal a Juan Carlos Gómez-Barthe.

Esta nueva entidá tendrá ente les sos fines la recuperación y difusión de los valores del Valle de L.laciana en particular y del monte occidental astur-lleonés en xeneral, asina como la proteición y revalorización de la so historia y patrimoniu. Pa ello, organizaránse nos próximos meses estremaes actividaes, esistiendo la idea d’espublizar delles obres y documentos de relevancia.

D’esta miente, ente los oxetivos más inmediatos del "Club Xeitu" tará la edición d’un boletín añal, baxo la cabecera de "Xeitu", nel cual sedrán asoleyaos trabayos d’investigación y artículos venceyaos cola zona. El boletín saldrá’l btanu próximu y sedrá distribuyíu principalmente ente los socios del club, si bien una parte de los exemplares sedrán puestos a la venta.

Otra de les actividaes previstes a curtiu plazu sedrá la organización del Concursu Lliterario en Palluezu (variedá suroccidental del asturianu) "Guzmán Álvarez", n’homenaxe al recordáu filólogu babianu fináu va cuatro años. Nesti certame, del que sedrán presentaes les bases el mes d’abril próximu coincidiendo cola celebración de la Feria del Llibru en Vil.lablinu, estableceránse dos premios, ún pa la modalidá de poesía y otru en prosa. El xuráu d’esti certame tará presidíu por Roberto González-Quevedo, secretariu de l’Academia de la Llingua Asturiana.

Comentar este artículo