UNA-Mocedá denuncia l’agresión d’un guardia civil a ún de los sos militantes

Los fechos asocedieron cuando l’afeutáu foi sacáu del chigre de manera violenta por ún de los axentes enantes de ser agredíu pol mesmu, al espresar el so refugu (cola mayoría de los presentes nesi momentu), de forma verbal y en nengún caso faltando al respetu a los axentes, pol acosu qu’esi mesmu chigre y los que lo frecuenten lleven sufriendo nos meses últimos pola guardia civil.

Según la organización "esti nun ye’l primeru nin paez que sedrá l’últimu casu d’agresiones, acompangaes de vexaciones y humildaciones, por parte de miembros de les "fuercies y cuerpos de seguridá" españoles, que nesti casu dieron llugar a un parte de lesiones nel hospital, al que tuvo que desplazase’l nuesu compañeru". Continuen esponiendo que "pa nós tratase non solo d’una agresión intolerable por parte d’un axente supuestamente encargáu de velar polos drechos de les ciudadanes y ciudadanos, sinón que tamién ye un esponente del emplegu que faen dellos axentes de l’amplia cobertura que la llei-yos da pa enaltecer los más baxos instintos de prepotencia y humildación de los ciudadanos, recordando dafechu los métodos emplegaos en tiempos de la dictadura franquista".

UNA-Mocedá al traviés del so comunicáu amosó’l so "más contundente refugu a esta agresión y escontra los métodos emplegaos por dellos axentes, tanto nel casu del nuesu compañeru como en tantos otros que davezu puen vese nos medios de comunicación, y denunciamos al empar la carencia absoluta de seguridá xurídica énte estos energúmenos con uniforme qu’hasta se nieguen con despreciu y chulería a cumplir cola so obligación de dar el númberu d’identificación", añadiendo que "el camín hasta algamar unes fuercies de seguridá asturianes y plenamente integraes nos valores democráticos ye, como se ve, perllargu", camienten na organización.

Pela so parte, la federación de partíos UNA, anuncia que reservase les midíes llegales oportunes escontra’l supuestu axente de la seguridá ciudadana, yá que "pese a nun tener el so númberu de referencia, nun sedrá difícil identificalu".