La Eurocámara refuga aplicar a los blogues les mesmes normes que cumplen otres publicaciones

El Parlamentu Européu ta acabantes de refutar una propuesta pa que los blogues tengan que siguir les mesmes normes qu´un mediu de comunicación al usu. El proyeutu de regulación de les páxines personales on-line foi visto polos internautes como una midida pa reducir la llibertá n´internet. La resolución finalmente aprobada, 307 votos a favor y 262 en contra, reconoz la importancia de los blogues y la so contribución “a la llibertá d´espresión”.

Sicasí, el parlamentu común quixo afitar que nun periodu curtiu de tiempu tien d´abrise l´alderique sobre l´estatus de les bitácores n´internet. Los eurodiputaos quixeron esclariar qu´amás de por persones privaes, los blogues tán siendo usaos por profesionales de la información, lo qu´abre l´alderique sobre la so regulación llegal. Amás, el testu fala sobre la importancia de los drechos d´autor nos medios on-line y establez que les “terceres partes tengan que citar a la fuente”.