Gales ta preparada p’asumir les competencies llingüístiques

Esta primer llei, siempres según BBC, prevé’l nomamientu d’un comisariu pa la llingua galesa, el que sedrá’l responsable cimeru de velar pa que seya posible l’usu del galés nos principales aspeutos del día a día. Una de les xeres destacaes, y de xuru más polémiques, sedrá ocupase de que tanto l’alministración pública como les empreses privaes de dalgunos seutores -servicios, tresporte- empleguen la llingua propia de Gales, cola potestá de sancionar a aquelles que non cumplan los mínimos establecíos.

Según el viceprimer ministru Ieuan Wyn Jones, l’oxetivu d’esta llexislación sedrá dar "más drechos" a los falantes de galés en cuanto a servicios, y qu’establecerá «más competencies y sanciones pa garantizar que se cumplen les promeses».

Dos años y medio dempués, d’alcuerdu a les previsiones, la llegada de les competencies en Cardiff (Caerdydd, en galés) produciráse cola sanción real el día 10. La Welsh language legislative competence order (LCo, Orde pola competencia llexislativa sobro la llingua galesa) tuvo de perpasar, en dos años y medio, l’aprobación de les cámares llexislatives galesa y británica. A partir de la entrada en puxu, valdrá de marcu pa esparder nueves midíes rellacionaes cola llingua galesa, dende Gales y ensin pasar per Londres