Bloque por Asturies recuerda a Migoya que la planta nun ta nel pautu de Gobiernu

"La señora Migoya paez que vive nun mundu paralelu a la realidá", señalaron dende BA, recordando a la portavoz que nun ye la "delegada de clase" de la FSA. "Migoya paez que nun conoz la realidá nin sabe entender el pautu de gobiernu que la tien a ella precisamente de portavoz del executivu asturianu", añadieron.

BA dixo que’l Gobiernu asturianu nun tomó decisión nenguna, porque esisten puntos de vista "opuestos", razón pola que nun se trató nel Conseyu de Gobiernu. "Tamos viendo nes selmanes últimes pernerviosos a los cargos orgánicos de la FSA y al coru que siempre repite lo más alto que pue l’estribillu que marca’l direutor, pero’l casu ye que col tema de la incineración lo qu’hai que dar son argumentos, non voces".

Per últimu, BA dixo que la incineradora seguramente seya un "bon negociu" pa unos pocos, pero non una necesidá pa la sociedá asturiana.