Areces diz que’l nacionalismu n’Asturies tien pocu futuru

Según el presidente asturianu, el nacionalismu respuende a «espresiones minoritaries, porque n’Asturies, como los ciudadanos, les fuerces representen el sentir y el pluralismu na vida política asturiana. Yo creo que’l nacionalismu nun va tener nenguna espresión significativa na política asturiana», indicó Álvarez Areces.

A estes esplicaciones, el presidente asturianu amestó’l so discursu habitual de qu’«Asturies ye una rexón perguapa, que tien una imaxe positiva» y añadió qu’esa imaxe positiva conservábase «a pesar de los problemes d’Asturies y de la so conflictividá pasada y de les sos referencies».

Nesti sen, Álvarez Areces, aseguró que la so intención ye tratar de tresmitir que, «amás del paisaxe, de la nuestra fonda hospitalidá y forma de ser, hai una Asturies innovadora que se desconoz y que camina al futuru».

Volviendo al tema de la identidá, el líder socialista afirmó qu’Asturies ye «una comunidá con una identidá mui fonda» y que «podíemos facer d’eso un arma reivindicativa territorial con plena llexitimidá». Sicasí, comentó qu’eso nun se fixo «porque Asturies siéntese fondamente integrada n’España, ye una comunidá que reclama la so identidá, demuéstrala porque tenemos una inmigración de va más de dos sieglos, porque nel mundu supimos lo que significa dir a otros sitios y ser acoyíos, y tener una visión amplia de la vida», un fechu que, al so xuiciu, «ayudónos muncho».

RESPUESTA DEL BLOQUE POR ASTURIES

La formación política Bloque Por Asturies (BA) cargó güei escontra Vicente Álvarez Areces, por estes declaraciones. Según el portavoz de BA, Pablo Fernández, eses pallabres del dirixente asturianu confirmen la "necesidá imperiosa" de relevar a Areces al frente del Executivu asturianu.

Dase la circunstancia de que la formación de Pablo Fernández forma parte de la coalición que gobierna xuntu al PSOE. "Areces ignora les fuercies que componen el so Gobiernu, porque BA ye un partíu nacionalista", apuntó Fernández. El dirixente de BA tamién abrió otra posibilidá: que les declaraciones d’Areces seyan frutu d’un cinismu "marca de la casa".

En cualquier casu, Pablo Fernández afirmó que’l nacionalismu asturianu sí tien futuru y qu’asina queda demostráu col sofitu que tien nes urnes. De fechu, BA tien representación nel Gobiernu del Principáu, nel Parllamentu asturianu y nos ayuntamientos. "Son representaciones que provienen del apoyu que la sociedá ta tresmitiendonos y qu’abren unes espeutatives de futuru perinteresantes de cara a la formación d’un escenariu nuevu qu’allugue a Asturies nel llugar que-y correspuende", concluyó Pablo Fernández.