Polémica nel Conceyu de Xixón al concedese nun solu día la llicencia a Enagás pa la regasificadora

Un día tardó en dar llicencia’l conceyal d’urbanismu, el socialista Pedro Sanjurjo a Enagás pa entamar a construyir la regasificadora. La Coordinadora Ecoloxista d’Asturies (CEA) quier denunciar píblicamente esta actuación y pide al Conceyu un informe detalláu de como pudo dase permisu a una obra tan complexa en tan pocu tiempu.

Según sorraya la CEA, Enagás presento la concesión de llicencia d’obres pa Precarga de Terrenos en Terminal Regasificadora que foi solicitada’l 15-12-2009 y concedida por Resolución del Conceyal Delegáu’l 16-12-2009 (Pedro Sanjurjo González).

Los vecinos tán contra la regasificadora

Hai de recordar que dende’l pasáu día 30 de payares, una vez comprobao, tán executándose obres nel solar cedíu a Enagas pa la instalación de la regasificadora careciendo estes obres de la obligatoria llicencia municipal del Ayuntamientu de Xixón, la CEA solicitó énte l’Ayuntamientu de Xixón y l’Autoridá Portuaria la paralización de les obres.

A pesar de les denuncies continues, les obres continuaron con total normalidá. El pasáu 3 d’avientu l’Alcaldesa de Xixón sorrayó nos medios de comunicación que les actuales obres de la regasificadora non precisaben llicencia por realizase nel subsuelu. Pa CEA "ye una casualidá que 12 díes dempués tramitasen de forma urxente esta llicencia como obra mayor, llicencia que separten de la istalación de la regasificadora como si fora posible separtar les obres d’esta instalación industrial por estayes al gustu del Conceyal o Alcaldesa como se fai en Xixón".

Poro, los ecoloxistes piden un informe a l’Ayuntamientu de Xixón pa que nidiamente fale de les razones pa axilizar nun solu día, un trámite tan complicáu como esta llicencia nunes complicaes obres nun espaciu recién creáu como son los rellenos del Musel.