IU fai amarraza pol pautu de gobiernu col PSOE

La FSA-PSOE tien nidíu qu’IU va aceptar la incineradora como mal menor, con tal de siguir nel Gobiernu asturianu ya que de lo contraríu saldría mal parada, na oposición y ensin capacidá d’algamar coses pola so incapacidá manifiesta pa pautar col PP, asuntu que nun-y diben perdonar los sos votantes. Los Verdes yá anuncien la so posible salida del gobiernu.

El PSOE ta dimpuestu a forciar l’alcuerdu de gobiernu porque consideren qu’IU tien de ceder "parcialmente" en favor de la incineradora. IU s’alcuentra na plataforma Incineradora Non pero entama a asumir que la incineradora "de facese" nun tien porque ser un "métodu central" pala eliminación de residuos sólidos urbanos (RSU).

Dende la FSA ta redirixendo la estratexa que pue salvar a IU de finar na oposición, mentando que’l reciclaxe de les basories y la incineración nun tienen porque tar reñies. Complicada papeleta pal socíu menor del Gobiernu asturianu que vese nuevamente como ya-yos pasara en llugares como la Casa Conceyu d’Avilés de tar "o cola pancarta o na poltrona" nel casu de la privatización (los socialistes, nomanlu externalización) de la xestión del agua.

Jesús Iglesias, coordinador xeneral d’IU vieno a dicir que "el paútu de gobiernu nun sal favorecíu". Amás na llínea marcada pola FSA, sorrayó que "Nel casu que’l Gobiernu apueste por una macroincineradora que queme 450.000 tonelaes de basories l’añu, se tara vulnerando’l paútu de gobiernu".

Pela so parte Los Verdes, en coalición con IU y por aciu d’ello socios de gobiernu, anuncien güei en prensa que l’asuntu de la incineradora conllevaría’l fin de la so presencia nel gobiernu asturianu.