La solidariedá con Haití estrase per toa Asturies

En dellos conceyos asturianos con iniciativa pública o privada s’entamen actos, conciertos o gales pa recaudar fondos en solidariedá con Haití y la catastrofe humanitaria que ta sufriendo.

Asina, un conciertu coral nel Muséu Maritimu de Lluanco vien de recaudar más de 3.500€. Ente otros actos, ONGs como Solidaridad Internacional organiza ventes de chocolatines de comerciu xustu nes cais de Xixón y Uviéu o Cruz Roxa vien d’organizar sesiones de teatru en Siero. Delles empreses privaes repartides per tol país vienen de facer donaciones y hasta un foru d’asturianos aficionaos a los reloxes vien de donar más de 2.000€ recaudaos a traviés d’un sortéu benéficu.

Ente ayeri y güei se cellebra en Llaviana, tamién pa recaudar fondos, unes xornaes solidaries. Asina mientres ayeri foi la música nun conciertu güei ye’l teatru a traviés de la compañía La Fumarea, qu’a les 20.15 hores fairá la obra "El Bolero de Chano" na Casa la Cultura. Tamién güei a les 20 hores, en Villaviciosa, s’entama’l Festival Solidariu SOS Haití nel Teatru Riera nel qu’andecharán entidaes, colectivos y persones del conceyu.