Xuventú Asturianista ente la gala "Xixón fala n’asturianu"

Otru añu más l’Ayuntamientu de Xixón (a traviés de la Conceyalía de Cultura Tradicional y Llingua Asturiana) organiza la gala “Xixón fala n’asturianu” onde se nos intenta “vender” lo mucho que fai pol asturianu l’Ayuntamientu gobernáu pol PSOE e IU.

Queremos denunciar la hipocresía y la poca vergoña que tienen, en especial IU con Jesús Montes Estrada a la cabeza, los que prometieron la oficialidá nel Estatutu, los que dicen defender la llingua asturiana.

Rialmente dende Xuventú Asturianista entrugámosnos qué faen nesta conceyalía y qué utilidá tien si nun s`usa la toponímia oficial nel propiu Ayuntamientu, si nun hai un usu real de la llingua asturiana nel Ayuntamientu, nin les webs arrellaes (propia web del Ayuntamientu, Teatru Xovellanos…).

A too esto hai qu’añadir que fai más d’un mes un ciudadanu foi menospreciáu y humillau pol usu del asturianu nun trámite del Ayuntamientu (vulnerando la Ordenanza Municipal d’Usu del Asturianu aprobada por ellos mismos).

Polo tanto, Xuventú Asturianista denunciamos públicamente la hipocresía d`Izquierda Unida, la falsedá política del Señor Montes Estrada, Conceyal de Cultura y Llingua Asturiana y edil d’IU en Xixón.

Pedimos la dimisión de Montes Estrada de la Conceyalía de Cultura y Llingua Asturiana y animamos a los ciudadanos que realmente tienen afectu a la llingua asturiana a manifestase contra esti tipu d’actos que solo valen pa xustificar la paupérrima política llingüística que lleven alantre.