"El Principáu para les escavaciones en La Carisa por "prexuicios ideolóxicos"

Énte les últimes informaciones qu’indiquen que, pesie a les peticiones de los conceyos d’Ayer y L.lena, el gobiernu asturianu nun va apurrir más financiación pa siguir coles escavaciones en La Carisa.

La Estaya de Cultura d’Unidá Nacionalista Asturiana (UNA) a traviés del so reponsable, Ignaciu Llope, criticó duramente esti parón, afirmando que La Carisa y tolo que l’arrodia ye vital pa conocer el nuesu pasáu, y supón un retu apasionante pa los investigadores porque pue apurrir lluz sobre delles de les etapes históriques más escures de la nuesa historia.

Según Llope, cualquier gobiernu asturianu consecuente y responsable centraría gran parte de los sos esfuerzos nuna zona importantísima pa conocer meyor d’au venimos.

El responsable de cultura d’UNA asoleyó "nel fondo d’esti aparente desinterés por parte del departamentu que dirixe Mercedes Fernández, tán presentes prexuicios ideolóxicos basaos nel auténticu pavor que tien la FSA-PSOE a poner en valor y dar a conocer cualquier aspectu que tenga que ver cola identidá específica asturiana".

Esti fechu contrasta, según Llope, "cola política de cultura basada en xigantismos delirantes y estremadamente caros, como los de Laboral, o n’atopar el nuesu pasáu romanu en cualquier requexu, quiciabes pensando de forma restorcida, que la presencia romana n’Asturies pue tapecer la singularidá de la historia y la identidá asturiana".

Dende UNA arguméntase que’l mieu de la FSA-PSOE a les posibles interpretaciones de la constatación de que "durante la invasión romana los pobladores d’Asturies acturaron conxuntamente pa defender el so territoriu, o de la defensa del territoriu asturianu nel sieglu VIII" faen que’l PSOE niegue a la sociedá asturiana la posibilidá de conocer más sobre una dómina, un momentu y un llugar que todía tien muncho que revelar".

Llope comentó qu’estos "xacimientos únicos y con tanto que nos enseñar, en cualquier otru llugar sedríen motivu d’arguyu pero paez que nel casu de la Conseyería de Cultura d’Asturies paez que molesten. L’interés ye nulu, nun hai nengún procuru nin interés nel estudiu científicu, la so conservación, y la so divulgación" declaró Ignaciu Llope, añadiendo que "otru casu significativu ye’l de la Sierra de Carondio nel conceyu d’Ayande, onde’l gobiernu asturianu xunto coles empreses xeneradores d’enerxía van acabar con uno de los conxuntos megalíticos más importantes d’Asturies".

Sicasí, Llope emponderó a los representantes municipales d’Ayer y de L.lena pol so interés n’invertir los sos recursos nel mantenimientu de les excavaciones "exemplu que debería seguir la Conseyería de Cultura, que manexa unos presupuestos muncho más elevaos que los d’estos conceyos. Amás de tener en cuenta que los trabayos que requeríen una mayor inversión económica yá se ficieron nos años anteriores, polo que dar por acabáu l’estudiu, cuando los propios espertos consideren que ye necesario más tiempu, ye un sinsentíu".