Cultura quier cesar a los que nun combayen colos sos determinos

José Mª Naveiras Escanlar, más conocíu como Pepe El Ferreiro, direutor del Muséu Etnográficu de Grandas de Salime dende 1989 puede ser cesáu del so cargu, ensin avisalu, nun aconceyamientu del consorcíu que xestiona’l Museu Etnográficu de Grandas de Salime y que preside la conseyera de Cultura, Mercedes Álvarez.

El Consorcíu va aconceyase’l martes, dempúes de más de dos años que nun s’aconceya con un únicu puntu nel ordé del día "Cese y nomamientu del direutor". Nesti consorcíu nun foi invitáu Pepe El Ferreiro.

Naveiras Escanlar ye una de les persones que más sabe d’etnográfia asturiana, en toos estos años encargose, y enantes de crease’l muséu en 1984 cuando yera presidente Pedro de Silva, de recoyer diferentes pieces de calter etnográficu qu’exponia nos baxos de la Casa conceyu de Grandas de Salime. A pesar de dedicar tola so vida a preservar el patrimoniu cultural, dinamizando’l conceyu, la económia y el turismu na comarca, Pepe El Ferreiro va ser sustituyíu ensin contemplaciones. L’añu pasáu tuvo cerca de 21.000 visitantes el Muséu etnográficu que dirixe.

Son conocies les discrepancies que tien Pepe coles alministraciones públiques, incluso con dalgunos de los sos patrocinadores como Caxastur por nun aportar perres suficientes pa caltener el muséu. Esta pue ser la base d’esti movimientu de la Conseyera de Cultura, Mercedes Álvarez pa camudar el so direutor. Tamién nes diferencies irreconciliables que caltien col alcalde de Grandas de Salime, el socialista Eustaquio Revilla, pue tar esti sorprendente cambéu.

Pero Pepe El Ferreiro tien angüaño nes redes sociales un gran sofitu a la so xestión y la sinrazón de Cultura. Nel Facebook creose un grupu de sofitu col nome Apoyo a Pepe El Ferreiro. y na prensa escrita tantu LNE como’l tamién diaríu dixital Elcomentario.tv ficieronse ecu de la denuncia.

A too esto, el Gobiernu asturianu vien d’amenorgar nun 50 por cientu’l dineru, ya perprobe, que la Conseyería de Cultura ufre a la Rede de Museos Etnográficos y la cantidá qu’esti añu aporta ye de 65.000 euros.