EL VIENRES 29 DE XINERU EN EL PARCHE D’AVILES A LES 19:00 HORES
La CSI convoca una concentración contra la reforma llaboral
25/01/10
La Corriente Sindical d’Izquierdes (CSI) convoca pal vienres 29 de xineru una concentración delantre la Casa Conceyu d’Avilés, na Plaza de El Parche contra un posible amenorgamientu de derechos de les y los trabayadores na reforma llaboral que tienen de pautar el Gobiernu español, la patronal y los sindicatos UXT y CCOO.
La reforma llaboral que ta siendo pautada ente’l gobiernu, la patronal y los sindicatos CCOO y UXT, pal sindicatu asturianu CSI, "apareya otra vuelta de tuerca más na estratexa de facer pagar a los y les trabayadores los costes d’una crisis de la que nun son culpables y que namás se debe a l’avaricia y la irresponsabilidá de la patronal y a la pasividá’l Gobiernu", según sorrayen los sos responsables.
El despidu de baldre, l’allargamientu la edá xubilación, la reforma y amenorgamientu les pensiones, abaratar y facilitar entá más los Espedientes de Regulación d’Emplegu, nuevos contratos basura o rebaxar les cotizaciones empresariales a la Seguranza Social, son dalgunes de les custiones que se tan negociando y que van suponer más precariedá llaboral y peores condiciones de vida y trabayu pal conxuntu los y les trabayadores.
Pala Corriente Sindical d’Izquierdes (CSI), la reforma llaboral supón "a la fin, un nuevu ataque a los drechos de la clas obrera, cola complicidá activa de los dirixentes de CCOO y UXT".
Pa finar dende’l sindicatu asturianu sorrayen que "la patronal quier más beneficios, el Gobiernu necesita “paz social” y los sindicatos mayoritarios precisen subsistir, precisen financiación pa continuar coles sos estructures, los sos lliberaos y los sos privilexos. Asina, too apunta a un alcuerdu ente ellos que van pagar los y les trabayadores con más paru, más desigualdaes sociales, más probitú y más represión.
Ante too ello, la clas obrera tien d’atopar la so fuercia comu coleutivu, tornando´l llugar de trabayu nel escenario de la llucha social y faciendo un sindicalismo alternativu que-y ponga frenu a esta nueva agresión".
