R&PS asperen una ventena de diputaos nes eleiciones en Francia

Onde R & PS espera unos resultaos meyores ye n’Occitania, un territoriu que tradicionalmente nun fore nada bonu pa ello. Nesta ocasión, ensin embargu, la entrada de los candidatos del Partíu Occitanu (POc) nes llistes de EE pue frayar esta cigua. Según los cálculos que fai R & PS cuntando los llugares qu’obtuvo’l POc dientro de les llistes de los ecoloxistes, l’occitanismu políticu podría algamar ente 6 y 10 diputaos rexonales. Un resultáu hestóricu, ensin dulda, pa un partíu que propugna l’establecimientu d’una autonomía que meza les destremaes rexones occitanes.

Otra formación qu’aspera consiguir bonos resultaos ye’l Partíu de la Nación Corsa (PNC), formación autonomista que l’añu pasáu unvió a Bruxeles un eurodiputáu, François Alfonsi. El PNC tien esperances fonderes de sacar un bon resultáu nos comicios a la Xunta de Córcega. Fai unos meses una encuesta dicía que perpasaría’l 10% de los votos y que, poro, pasaría a la segunda ronda de les eleiciones. Agora, amás, el partíu reconoz qu’avanzaren bultablemente na ellaboración d’una llista conxunta col otru movimientu autonomista corsu que quier presentase a les rexonales, Insieme. Esto y la fuercia que-y da l’alianza con EE faen prever a los autonomistes un bon resultáu.

En Bretaña, la Unión Democrática Bretona (UDB) ye’l partíu autonomista que concurre en coalición con EE. Según los cálculos de R & PS, el partíu algamará 4 diputaos na Xunta de Bretaña. Ente otros hitos, la UDB algamare asitiar un candidatu de so como cabeza de llista d’EE, concretamente nel departamentu de les Costes d’Armor. La llista d’EE en Bretaña, que se manifestó favoratible al federalismu, foi encabezada por Guy Hascoet, ex secretariu d’estáu francés mentanto’l mandatu de Lionel Jospin. Non obstante, nun hai d’escaecer qu’en Bretaña se presentarán otres dos llistas con partíos bretones. D’un banda, la que formaren el Partíu Bretón alredor del hestóricu activista Christian Troadec. La otra, la que formen los independentistes de Breizhistance (antiguu Emgann), qu’entá nun aclararen como concurren a les eleiciones.

Pa finar esti repás, l’otru partíu que R & PS calcula que puede obtener representación ye’l Movimientu Rexón Saboya (MRS), que se presenta con EE nes llistes de la rexón de Ródanu-Alpes y que podría consiguir qu’un candidatu de so nel departamentu de l’Alta Saboya entre nel parllamentu rexonal. Nel programa d’Europa Ecoloxía Ródano-Alpes inclúise’l compromisu de la coalición d’«estudiar» la «proposición d’un País de Saboya o d’un territoriu de los Alpes». Precisamente, la creación d’una rexón de Saboya fore una de les cimeres reivindicaciones hestóriques del nacionalismu saboyanu.