UNA esixe al conceyu d’Uviéu una política de conservación del padremuñu artísticu-cultural del conceyu

Unidá Nacionalista Asturiana critica que’l conceyu d’Uviéu nun tenga una política de conservación del padremuñu material del conceyu y esixe llueu una mayor atención pa con tos aquellos elementos histórico-artísticos que constitúin una parte vital del padremuñu cultural del mesmu.

Pa l’agrupación municipal d’Unidá Nacionalista, resulta hipócrita l’actitú del alcalde solicitando dineru al Gobiernu d’Asturies pal caltenimientu y fomentu del Prerrománicu cuando’l consistoriu de la capital tampoco nun ye a desendolcar nin tan siquiera una política cultural mínimamente seria que permita, igualmente, caltener en bones condiciones y fomentar la riqueza cultural de la ciudá.

Nesta llinia, dende UNA pídese la restauración y el cuidáu del estáu de la panera del sieglu XVIII allugada nel Parque d’Hibiernu, que ye maltratada por viandantes que dediquen el so tiempu llibre a facer muezques y escarabayar con pintura un monumentu históricu.